【活動邀約】我愛峇里島 I Love Bali Cafe

其實三月尾已經收到電郵邀請, 不過種種原因就拖吓拖吓拖到四月上旬先打電話去訂位  

我被邀請去食店試食嘅機會唔多, 但喺嗰幾次嘅經驗入面, 唯獨此店 我愛峇里島 I Love Bali Cafe 夠Guts , 要求被邀請的人以神秘顧客嘅身份去完成這試食任務, 還大口氣的說:「無論幾時, 幾多人嚟, 食幾多食物都是免費。」  我倒是為店主擔心 , 萬一...萬一...真係有人帶三五成羣上嚟食, 食完就表明自己係邊位, 係受邀請嚟試菜  , 咁嗰晚店主咪可能食白果 (應知道食店坐位有限, 大約有3張四人檯, 3張2人檯嘛~)   

諗得出用「神秘顧客」呢個terms, 一定包含了對自家厨藝的無比信心及對家中兩老(此店廚師, 店主的岳母及舅媽)的疼愛與關懷...無壓力煮意       




我愛峇里島 I Love Bali Cafe為於登打士街恆威商業中心14樓, 但原來那座商業中心的入口處是相當隱秘, 等我用黃色箭咀指俾各位睇吓    

搭升降機上到14樓, 一出 升降機就到餐廳 入口  

 由我座位嚟睇餐廳範圍就係咁一眼睇晒    

居高臨下咁望落下面, 未試過咁樣睇旺角    

店主Kelvin很用心很盡力咁為我地介紹menu內的菜式, 他連食物來源, 製作方法等等都向我們大約講解(別忘記, 他根本不知道我們是神秘顧客)  , 我們夫婦倆想又想了很久也不知道選什麽食物好(真係有好多款都想試, 雖知道是免費, 但我們都不想「食人隻車」佔人太多便宜) 。  就這個時候Kelvin好似明白我地諗乜咁, 更加詳細咁介紹呢樣點煮, 嗰樣又點得嚟, 結果是更加難選擇     算把啦, 就叫二人餐     下次再自費嚟試其他食物 


二人餐正價是$358, 包前菜、主菜、串燒、伴菜、新鮮水果及兩杯飲品, 白飯更加係任裝 。  呀!  唔記得講喺讀緊menu嘅時候, Kelvin為我們送上四塊鱈魚脆餅krupuk kemplang

呢樣脆餅喺Indo Market都買過嚟食, 脆卜卜又唔會碎到周圍都有, 味道是帶點魚味兼鹹鹹香香咁, 食完都唔覺口渴   


二人餐嘅前菜我們選了Gado Gado

Kelvin話喺印尼, 唔同地區會用唔同蔬菜來煮Gado Gado, 呢款Gado Gado係Kelvin嘅舅媽憑記憶記番起當佢十幾歲時喺印尼煮及食過嘅材料及味道來煮成的。  温度是暖烘烘的, 材料有合掌瓜、青瓜、豆角、薯仔、青通菜、芽菜、椰菜、雞蛋、炸豆腐、蝦片, 而汁料就有點辣, 除了有花生外還有落幾款神秘nuts, 腰果、椰糖等等, 所有汁料都是即磨即煮, 唔會買現成醬汁的。  不過那些蔬菜真係好容易出水, 撈淡了味道就無咁好吃     

這杯是我的Salted Ayran 鹹乳酪, Kelvin介紹說這款屬於土耳其夏日飲品  流汗多也不怕, 因為落了鹽就可以補充身體失去的水份、電解質, 就好似大家做運動常飲的寶礦力一樣  此店會把Salted Ayran 鹹乳酪做成凍湯般, 在原味乳酪裏落鹽、薄荷碎及蒜蓉, 其實都只不過是微微鹹度啫~ 當冰溶化時, 同樣地會把Salted Ayran 鹹乳酪溝到又稀又淡, 那就唔好飲囉

Kopi Mandheling Dingin-diseduh 冷萃印尼曼特寧咖啡其實是由這三杯東東調成, 台灣有三杯雞, 哈~ 印尼就有三杯啡 高身那杯是奶泡, 左下那杯就是齋咖啡, 右下那杯有鐵羹的就是稀椰糖漿。

經過我丈夫的mix and match, 他終於tailor made 了一杯專屬於他的咖啡    話明冷萃, 就係用冰水來把咖啡粉浸三天浸出味道來, 保留咖啡的原型味道, 正如Kelvin所堅持:「我係老細, 我話浸三日就浸三日, 唔洗好似打工咁睇老細面色, 做唔到應有嘅效果出嚟。」     

跟住送來的是沙爹羊肉串燒 , 先把青檸汁搾落沙爹醬裏, 沙爹醬上有些甜豉油, 這麽一來沙爹醬就會甜得來帶果酸也能帶起沙爹醬裏花生味來；熱辣多肉汁的羊肉串, 有少許羊燥味, 外面看來燒到全熟但原來內裏肉很嫩, 顏色也偏向粉紅 

這是五香酥Ngoh Hiang Soo ... 是從厦門傳到印尼亦是印尼少有以豬肉入饌的菜式。  在印尼只有峇里島人及華僑會吃豬肉, 因為峇里島人絕大部份是虔誠印度教徒, 他們是不吃牛肉的。 這個五香酥Ngoh Hiang Soo先用腐皮包住粉芋、馬蹄肉、豬肉並用五香粉調味, 再拿去炸脆。 吃時沾一些鹹鹹辣辣芫茜醬來增味   

這兒的巴東牛肉是一樣非常值得去吃的菜式, 正宗巴東的食譜, 店方總共用了5個小時來炮製, 不論心機或是爐火都好像香料般完全溶入巴東牛肉及醬汁身上。  別家用牛展來炆, 但原來牛展炆得耐容易散開致無肉食, 此店改用牛腩來炆, 牛腩特點是越炆越腍越肉質綿軟, 嗦晒香料湯嘅味道  我一向估計自己食得辣, 怎知道我會敗給它, 辣的程度有3隻辣椒, 最初食就覺得一口辣, 但原來高處未算高, 辣度是會慢慢攀升的, 後來Kelvin準備解辣用的冰鎮青瓜給我, 真神奇, 辣度真係慢慢退下來, 再後來用巴東牛肉配合白飯來吃, 噢~ 為什麼會不怎覺得辣呢???  
我開始食到牛腩的鬆化軟滑, 還吃到點點有咬口兼軟中帶韌的根位, 牛膏位一咬也有點溶化脂肪味, 這種少甜巴東牛肉還是第一次吃呢。Kelvin說此店所賣的巴東牛肉的辣度只不過是屋企裏吃的一半 , 還要自開業至現在, 巴東牛肉共減了四次辣, 已經減無可減, 再減辣就唔係巴東牛肉。

新鮮甜美生果

完全吃飽, 終於到了要向Kelvin揭開我們神秘顧客的面紗, 我倒反而有些緊張    我們大家互相作了些飲食交流, 而Kelvin也告訴我們厨房入面那兩位廚師媽媽很開心, 因為我和丈夫真係食嘢食到無剩, 連汁醬都撈埋     這種心情, 我當然會明白啦   


在這兒吃到的不只是食物咁簡單, 還包含了全家人的愛與信念, 我也想創個家庭式事業, 合家同心, 其利斷金       

我愛峇里島 I Love Bali Cafe

旺角登打士街36號恆威商業中心14樓全層 

5401 3402

http://ilovebali-fb.asya-kingdom.com
平均消費 : $100-$300